जिल्हा क्रीडा पुरस्कारांकरीता अर्ज सादर
करण्याचे आवाहन
प्रतिवर्षी राज्य शासनाच्यावतीने क्रीडा व युवक सेवा
संचालनालयाकडून राज्यातील व जिल्ह्यातील गुणवंत क्रीडापटु, क्रीडा मार्गदर्शक, व क्रीडा कार्यकर्ते यांच्या
कार्याचे व योगदानाचे मुल्यमापन होऊन त्यांचा गौरव व्हावा व प्रोत्साहन मिळावे या
उद्देशाने राज्यस्तरावर शिवछत्रपती क्रीडा पुरस्कार देण्यात येतात. जिल्हास्तरावर गुणवंत क्रीडा मार्गदर्शक पुरस्कार (एक), गुणवंत क्रीडा
कार्यकर्ता (एक) व गुणवंत खेळाडू पुरस्कार (तीन) असे जिल्हा क्रीडा पुरस्कार देण्यात येतात. या पुरस्कारांचे स्वरुप प्रत्येकी प्रमाणपत्र ,
स्मृतिचिन्ह व रोख रु.१०,०००/- याप्रमाणे आहे.
गेल्या दहा वर्षात सांघिक अथवा
वैयक्तिक मान्यताप्राप्त क्रीडा प्रकारात नॅशनल स्कुल गेम्स, वरीष्ठ राष्ट्रीय अजिंक्यपद स्पर्धांमध्ये प्रतिनिधीत्व केलेला खेळाडु
इत्यादींना मार्गदर्शन केलेले तसेच राज्य व राष्ट्रीयस्तरावर पदक विजेते खेळाडु
तयार केले असतील असे क्रीडा मार्गदर्शक 'क्रीडा मार्गदर्शक' या पुरस्कारासाठी अर्ज सादर करु शकतात. तसेच मागील दहा वर्षात एखाद्या
विशिष्ट अधिकृत खेळाच्या विकासासाठी, प्रचार व प्रसारासाठी, संघटनात्मक इ. प्रकारचे कार्य केलेल्या व्यक्तिंना गुणवंत क्रीडा
संघटक /कार्यकर्ता या पुरस्कारासाठी अर्ज
सादर करता येतील.
गुणवंत खेळाडु पुरस्काराकरीता मागील पाच
वर्षांमध्ये राज्य व राष्ट्रीय स्तरावरील मान्यताप्राप्त खेळांच्या अधिकृत
स्पर्धांमध्ये उल्लेखनीय कामगिरी करणा-या खेळाडुंना अर्ज सादर करता येतील. परंतु
खेळाडूंचे अर्ज त्या खेळाच्या अधिकृत जिल्हा संघटनेमार्फत शिफारस करुन सादर
करणे आवश्यक राहील.
या पुरस्कारासाठी शालेय शिक्षण
व क्रीडा विभागाच्या दि.१६ ऑक्टोबर२०१७
रोजीच्या शासन निर्णयाचे अवलोकन करावे. त्यानुषंगाने पात्र व इच्छुकांनी विहीत
नमुन्यातील आपले अर्ज संपुर्ण तपशीलवार माहितीसह भरुन आवश्यक कागदपत्रांसह जिल्हा
क्रीडा अधिकारी कार्यालय, सिंधुदुर्ग येथे दि.३० डिसेंबर 2017 पर्यंत
सादर करावेत. अर्जाचे नमुने www.dsosindhudurg.blogspot.in येथे
उपलब्ध करुन देण्यात आले आहेत. इच्छुकांनी विहीत कालावधीत अर्ज सादर करण्याची
दक्षता घ्यावी असे आवाहन जिल्हा क्रीडा अधिकारी श्री किरण बोरवडेकर यांनी केले
आहे.
